GISAGARA: GISHUBI BARASHIMIRWA KO BITA KU MUTEKANO WABO

Posted on 10 February 2013

Umurenge wa Gishubi uherereye mu karere ka Gisagara, urashimirwa ko ubu uhagaze neza mu mutekano, kuko kuri ubu umaze kuza ku mwanya wa 1 mu mirenge 13 igize aka karere mu myaka itanu ikurikiranye.

GISHUBI BARASHIMIRWA KO BITA KU MUTEKANO WABO

Uhagarariye ingabo mu ntara y’amajyepfo Maj.Gen. Mubarak Muganga

Umurenge wa Gishubi ushimwa ku bw’umutekano uharangwa kuri ubu, ni umurenge wakunze kurangwamo n’ubukene mu bihe byashize, ariko ubu ukaba uri kugezwamo ibikorwa by’amajyambere bitandukanye n’abaturage bakaba bari kwiteza imbere mu buhinzi butandukanye. Mu bikorwa by’amajyambere biri kuhagezwa birimo umuriro w’amashanyarazi, abahatuye bahamya ko bizabafasha kurushaho kubungabunga umutekano wabo kuko bazaba babonye urumuri ndetse n’itumanaho rikagenda neza cyane ko hari abavaga ku murongo bitewe no kubura umuriro muri telephone zabo.

Uhagarariye ingabo mu ntara y’amajyepfo Maj.Gen. Mubarak Muganga, ubwo yari mu gikorwa cyo gutaha ku mugaragaro ibikorwa by’iterambere muri uyu murenge wa Gishubi kuri uyu wagatatu tariki 6/2, yashimye uyu murenge kuba wita ku mutekano wawo, ashima ko mu birego n’ibibazo by’umutekano bijya byumvikana mu duce tumwe na tumwe tw’aka karere, uyu murenge udakunze kugaragaramo. Yemereye uyu murenge ubufasha ubwo aribwo bwose bw’ amaboko mu bikorwa bitandukanye uyu murenge wakenera kandi abizeza ko bazakomeza gufatanya kugirango umutekano usugire.

Ati “Ndashima imyitwarire yanyu mu bikorwa by’umutekano, kandi igihe cyose muzakenera imbaraga zacu mu bikorwa bitandukanye nko gukora imihanda, imiganda itandukanye twiteguye kubafasha, mbijeje ko tuzakomeza gufatanya kugirango umutekano urambe, ni duharanire rero gukomeze kwiteza imbere dufite umutekano urambye”

Umuyobozi w’intara y’amajyepfo Alphonse Munyantwali nawe wari wagendereye aka karere, yibukije abaturage ba Gishubi ko ibyo bamaze kugeraho byose birimo n’uwo mutekano, babikesha imiyoborere myiza kandi ko bagomba kuyibyaza umusaruro biteza imbere, aho kumva ko kubaho ntawe utsitara kuwundi byonyine bihagije.

Ati Ibyo tumaze kugeraho byose, uwo mutekano, ibikorwa by’amajyambere n’ibindi byose tubikesha imiyoborere myiza, ari nayo mpamvu dukwiye gukora cyane tukiteza imbere ntitwumve ko kubaho ntawe ugirana ikibazo n’undi bihagije. Turagomba gukora tukazamuka mu iterambere kuko dutekanye nta kitubuza gukora”

Uyu murenge wa Gishubi wahagurukiye kwirindira umutekano, bahana amakuru buri gihe kandi banakora amarondo uko bayiyemeje, gusa ariko haracyarangwa ibibazo by’amasambu hagati y’abaturage nabyo bizeye ko bizakemurwa vuba nk’uko ubuyobozi bwabyiyemeje.

 

 

Leave a Reply