GUKORA URUGERERO NI UKUBAKA ITERAMBERE-William Ntidendereza

Posted on 23 February 2013

GUKORA URUGERERO NI UKUBAKA ITERAMBERE

NYAGATARE: Guha agaciro ibikorwa barimo no gukora ibikorwa bizarangira bikaba urwibutso rwiza ni bumwe mu butumwa bwatanzwe ku ntore ziri ku rugerero mu mirenge ya Nyagatare na Karangazi mu karere ka Nyagatare.

Ni mu biganiro byahuje izi ntore na Bwana William Ntidendereza umuyobozi wungirije w’itorero ku rwego rw’igihugu.

Usibye ibikorwa by’ubukangurambaga kuri gahunda za Leta biranga izi ntore hirya no hino mu mirenge, bamwe muri uru rubyiruko bahisemo gushora imbaraga mu bikorwa bigamije iterambere n’imibereho myiza y’abaturage.

Nimuri uru rwego intore z’umurenge wa Nyagatare zubatse uturima tw’igikoni mu kagari ka Nyagatare mu mudugudu wa Mirama ya mbere.Ni igikorwa kizabyara umusaruro mboneza mirire ku batuye uyu mudugudu, kuko babonye uburyo bwo kwikungahaza ku mboga.

GUKORA URUGERERO NI UKUBAKA ITERAMBERE2

Bamwe mu bagenerwabikorwa b’uru urugerero barimo Uwamariya Odette, batangaje ko ibi ari ibintu baha agaciro bashingiye ku kuba bizagira uruhare mu kuzamura imibereho yabo.

Abandi barimo abakecuru b’imbaraga nke batangaje ko uru rubyiruko rubafashije kuko nibura kubaka akarima k’igikoni kamwe bitwara amafaranga ibihumbi icumi, bakaba bashima uyu musanzu w’imbarga bahawe n’urubyiruko.

 

Mu murenge wa karangazi mu kagari ka Rwisirabo ho intore zakoze igikorwa cyo gusibura umuhanda. Mu kiganiro bagiranye na Bwana William Ntidendereza yashimangiye ko ibi bikorwa barimo ari iby’agaciro abamenyesha ko ari uburyo bwo kubaka izina.

Aha yababwiye ko no mu bihugu by’ibihangange iyi gahunda yimakajwe kandi ikabyara umusaruro.

Aganira n’uru rubyiruko yabahaye urugero ko nko muri za kaminuza zo mubihugu byateye imbere usanga mu gutanga imyanya ngo abantu bige basaba ko umunyesuri agaragaza igikorwa cy’ubwitange yaba yarakoze bikamwongerera amahirwe wo guhabwa bourse.

“Ubu rero mubaye imfura,mubaye aba mbere form nk’iyi ije mushobora kwandikaho muti twakoze urugerero. Ntimukajye munabibuga mu cyongereza ngo National Service cyangwa…mujye muvuga urugerero babaze ngo urugerero ni iki”. William Ntidendereza

Zimwe mu mbogamizi bahura nazo nk’uko babigaragarije ubuyobozi bw’itorero ku rwego rw’igihugu harimo ibikoresho n’ikibazo cy’ingendo, gusa bakaba batangaza ko ibi bitazababuza gukora neza urugerero.

Ari ubuyobozi bw’itorero ku rwego rw’igihugu no mu karere ka Nyagatare batangaza ko ibi bibazo bizwi ariko bakaba basaba izi ntore kwihangana, kuko aribo bakoze urugerero bwa mbere.

Ngo ibi birabafashsa gutegura iyi gahunda neza mu myaka itaha nk’uko bitangazwa na Rwaka Nicolas ukuriye itorero mu karere ka Nyagatare.

“Namwe rero muri imfura mwemere muvunike, ariko ari nayo logique y’ubwitange buriya abandi babakurikiye usazanga bimeze neza.” Nicholas Rwaka

Bamwe mu baturage bakurikirana ibikorwa by’izi ntore mu midugudu batuyemo bahamya ko mu myaka iza zizavamo abayobozi bakunda abaturage.

Uwamungu Laurent wo mu mudugudu wa Mirama ya mbere abihamya ashingiye ku bwitange abonana izi ntore.

“Ntakabuza ko izi ntore zizaba indashyikirwa bitewe n’ibikorwa tumaze kwibonera zikora. Ibi biraduha ikizere nk’abaturage ko aba bazavamo abayobozi beza.”

 

 

Leave a Reply