Ruhengeri – Abashinzwe umutekano barasabwa kunoza akazi kabo bafatanyije n’inzego z’ibanze

Posted on 15 February 2013

Abashinzwe umutekano bo mu kagali ka Ruhengeri barasabwa kunoza akazi kabo bafatanyije n’inzego z’ibanze ndetse n’abaturage hagamijwe kubungabunga umutekano w’abatuye aka kagali n’ibintu byabo.

Ibi bikaba ari ibyatangajwe kuri uyu wa 13/02/2013,mu mwiherero w’umunsi umwe wahuje abashinzwe umutekano, abayobozi b’imidugudu, aba home guards n’abandi bafite aho bahuriye n’umutekano bo mu kagali ka Ruhengeri, umurenge wa Muhoza mu karere ka Musanze.

Umubyeyi Josiane, umunyamabanga nshingwabikorwa w’aka kagali, yavuze ko abaturage bagomba kugira uruhare mu icungwa n’ibungwabungwa ry’umutekano wabo, bahamagara abashinzwe umutekano igihe cyose bagize ikibazo, kuko aba home guards bakiri bake muri aka kagali.

Ati: “Turacyafite home guards nke muri aka kagali, ku buryo ari nka batandatu kuri buri mudugudu. Numero zabo zaratanzwe bityo ugize ikibazo cyose ajye yihutira gutabaza kuko ntawe utabaza ngo yo gutabarwa”.

Sirien Sibomana, umuyobozi w’umudugudu wa Susa, avuga ko iyo havutse ikibazo bafatanya ku gikemura, kuko umuyobozi w’umudugudu ari umuhuzabikorwa w’inzego zose mu mudugudu ndetse n’iz’umutekano.

Muhire Jean de Dieu, ukuriye home guards mu kagali ka Ruhengeri, yavuze ko abaturage bazajya baborohereza mu bijyanye no gucunga umutekano, bacana amatara ku mazu yabo, kuko bigabanya abambuzi bitwaza ijoro.

Yaboneye ho kandi kubibutsa ko bazajya babaha amakuru y’ahagizwe indiri z’abajura n’abanywa ibiyobyabwenge kugirango babate muri yombi batarangiza byinshi.

 

 

Leave a Reply