Bahoneza – Kinyarwanda, Rwanda Welfare, Social Welfare, Rwanda People, Nutrition and Diet, Rwanda Habitat, Living in Kigali

Ababyeyi bagera kuri 40 b’abana bafite ubumuga bibumbiye mu itsinda “Abishyize hamwe”, batijwe umurima wo guhinga n’urwunge rw’amashuri St Jean Bosco rwo ku Kamonyi, kugira ngo barusheho gutera imbere , maze babone uko bita ku bana ba bo.

Mu muhango wo gutangiza ku mugaragaro, igikorwa cyo guhinga umurima ufite ubuso bwa hegitari 1, urwunge rw’amashuri  St Jean Bosco rwo ku kamonyi rwatije ababyeyi bafite abana bafite ubumuga, wabaye kuri uyu wa gatatu tariki 9/5/2012, abo babyeyi basabwe guharanira kwiteza imbere kugirango babone uko bita ku bana ba bo uko bikwiye.

Ukuriye iryo tsinda Nyirahabineza Emilienne, atangaza ko bagize igitekerezo cyo gusaba umurima ishuri kuko babonaga ko bakeneye kugira igikorwa bahuriyeho kuko bahuje ibibazo byo kugira abana bafite ubumuga. Uwo murima batijwe rero ngo bakaba bateganya kuwuhingamo imyumbati .

Umunyamabanga Nshingwabikorwa w’umurenge wa Gacurabwenge Marthe Umugiraneza, yashimiye abo babyeyi bagize igitekerezo cyo gusaba uwo murima ishuri kuko n’ubundi wari igisambu kibereye aho. Abasaba kuwubyaza umusaruro bakiteza imbere kuko batakohereza abana ba bo ku ishuri bashonje.

Abo babyeyi bafite abana bafite ubumuga basanzwe bafatanya n’abarimu bigisha  kuri icyo kigo, kwita ku bana bafite ubumuga bahiga, akaba ari yo mpamvu ubuyobozi bw’ikigo butashoboraga kubima umurima wo guhinga ngo biteze imbere . Ushinzwe amasomo ku rwunge rw’amashuri St Jean Bosco, Munyarukundo Egide,  aragira ati “ntitwari kubima umurima kandi twizera ko nibatera imbere n’abanyeshuri bacu bazarushaho kubaho neza”.

Umurima batijwe uherereye mu kagari ka Nkingo, umurenge wa Gacurabwenge, munsi y’ikigo cy’ababikira b’abakalarisa, bakaba bazawuhingamo imyumbati.

Nyuma ya genocide yakorewe abatutsi mu mwaka 1994, imwe mu ngaruka yasize ni ugusiga imfubyi, abapfakazi ndetse n’izindi ngaruka nyinshi zagiye ziyiturukaho.Kimwe mubyo leta y’u Rwanda yahagurukiye ni uguhangana n’ingaruka zikomeye iyi genocide yasigiye abanyarwanda.

Mu kurwanya ingaruka iyi genocide yasize, leta y’ u Rwanda yagiye ishyiraho uburyo bwose bwo gufasha imfubyi n’abapfakazi basizwe iheruheru nayo, ndetse no kurwanya ihungabana rigenda rigaragara kuri bamwe mu banyarwanda.

Gusa ariko nubwo ibi byose bikorwa, hirya no hino mu gihugu haracyagaragara hamwe na hamwe urubyiruko nanubu rukireka amashuri yaba ay’imyuga nandi atandukanye, rugahitamo inzira yo kujya gushaka akazi ko murugo, nyamara rufite ubufasha buhagije bwo gukomeza amashuri yaba ay’imyuga nandi anyuranye.

Nyuma yaho  iki kibazo kigaragaye mu karere ka Rutsiro, mu murenge wa Ruhango, aho umwana w’umunyeshuri wigaga mu ishuri ry’imyuga ahisemo kujya gukora akazi ko murugo, akerekeza mu karere ka Karongi, nyamara yararihirwaga imyuga, ubu ubuyobozi bw’akarere ka Rutsiro burasaba ababyeyi n’abaturage muri rusange kudakoresha akazi ko mu rugo umuntu utarenge imyaka 18.

Mu kiganiro twagiranye n’umuyobozi w’akarere ka Rutsiro Byukusenge Gaspard yatangaje ko nyuma y’aho iki kibazo kigaragariye, kugeza ubu akarere ka Rutsiro kafashe ingamba z’uko nta muntu numwe wemerewe gukoresha umukozi wo murugo utarageza imyaka 18 ahubwo ko yagombye kumujyana ku ishuri.

Yagize ati ”ntibyemewe na gato kuko amategeko arazwi, nta muturage wemerewe na gato no kubikinisha gukoresha umwana imirimo ivunanye, noneho kirazira kumukoresha nk’umukozi wo murugo kandi uzi neza ko atarageza imyaka y’ubukure”.

Aha akaba yasabye ababyeyi kwita kubana babo kuko hari bamwe bivugwako babasibya ishuri bakabohereza mu isoko. Gusa yanavuzeko abarimu nabo bagomba kubigira ibyabo, kuko usanga ngo hari abarimu bamwe batajya bagenzura niba umwana yageze ku ishuri cyangwa ngo bakore ihamagara mu ishuri.

Aha twababwirako ubwo umwaka w’amashuri wa 2011 wari urangiye, Mu igenzura ryakozwe byagaragaye ko mu karere ka Rutsiro abana 23% mu mashuri abanza bataye ishuri bitewe n’uburobyi bukorerwa mu kiyaga cya kivu, hakaba ahari hafashwe ingamba ko yaba umubyeyi n’undi wese bireba ndetse n’inzego z’ibanze, bagomba gushyira ingufu mu guhangana n’iki kibazo.

Abatuye mu kagali ka Kinyonzo, umudugudu w’amabumba n’ahitwa Tunduti umurenge wa Kazo baravuga ko basigaye inyuma cyane mu bikorwa by’iterambere mu buzima ndetse n’uburezi.

Aba baturage bavuga ko bivuza kure nko muri kilometro zigera ku icumi, bakaba abana babo bakora kilometro zigera kuri umunani bajya kwiga,hakiyongeraho ikibazo cy’amazi aho hari abivomera ayasa nabi kuko amazi meza ari nko muri kilometro enye.

Kubwaba baturage bavuga ko iterambere baryumva batyo ariko k obo ntacyo babona kibageraho.

Umwe mu batuye muri iyi midugudu witwa Jen de dieu twaganiriye yavuze ko kuvakera yabyiruka abona aho yavukiye ntagihinduka ku iterambere mu bikorwaremezo yaba kwegerezwa poste de santé cyangwa guhabwa amazi hafi.

Mungaruka Jen de Dieu avuga abona kuri iki kibazo avuga ko hari abantu batari bake batazi gusoma no kwandika muri uyu mudugudu kuko amashuri yari kure yabo (8km)

Yagize ati”Icyo dukeneye  cyane  ni poste de santé kugirango yuzuzanye n’intego za mutuweri zo kwivuza neza,maze natwe tugire ubuzima bwiza. Hari abarindira kuremba ngo bajye kwa muganga kuko haba ari kure.”

Kuruhande rw’ubuyobozi ubuyobozi bwakarere ka Ngoma buvuga ko uwo mudugudu watangiwe kwegerezwa ibikorwa remezo nk’amashuri,aho kugeza ubu hagiye kuzura amashuri atandatu.

Aha hantu havugwa iterambere ko ritinda kubageraho uretseinsengero n’imihanda ntakindi kintu cyahagaragaraga muminsi yashize cy’igikorwaremezo. Amashuri agera kuri atandatu nayo amaze kubakwa muri uyu mwaka kubufatanye na  abaturage na leta.

Kuri uyu wa 23 Gashyantare mu murenge wa Nyarubuye ho mu karere ka Kirehe hatangijwe gahunda y’inkongoro y’umwana ku bigo by’amashuri , iyi gahunda ikaba yaratangirijwe ku kigo cy’amashuri cya Migongo aho abana bahawe amata mu rwego rwo gutangiza iki gikorwa.

Nk’uko umunyamabanga nshingwabikorwa w’umurenge wa Nyarubuye Karasira Antoine abivuga ngo iki gikorwa ni gahunda ya Leta yo gushaka uko hacika imirire mibi mu bana b’abanyarwanda, akaba avuga ko bagiye kuzajya baha amata abana rimwe mu cyumweru.

Umunyamabanga nshingwabikorwa w’umurenge wa Nyarubuye yabasabye ko byaba umuco mu murenge wa Nyarubuye, akomeza avuga ko iyi gahunda yo guha abana amata muri uyu murenge ari nziza cyane kuko muri uyu murenge hagaragaramo ibikorwa by’ubworozi bakaba kandi nta bijyanye n’indwara za bwaki zikunda kuhagaragara.

Akaba avuga ko bazajya bayaha abana biga mu mashuri y’incuke hamwe n’abana biga mu wa mbere kugera mu mwaka wa gatatu w’amashuri abanza, yongeraho ko umwana wanyweye amata adapfa kurwara bwaki.

Jean Marie Ntihabose umuyobozi wungirije ushinzwe uburezi mu karere watangije iki gikorwa cy’inkongoro ku mwana, yashimiye ubuyobozi bw’umurenge ku bufatanye n’abaturage kuba bariyemeje kujya bakamira abana.

Aha yabibukije ko ari igikorwa kiri mu gihugu hose mu rwego rwo kurwanya imirire mibi, akaba avuga ko aho bidashoboka kubona amata bakangurira abayobozi guha abana igikorwa akomeza avuga ko ababyeyi batemerewe kugurisha amata mu gihe umwana bareze batabanje kumuha amata yo kunywa aho kumuha amazi amata bayagurishije.

Ubu akarere ka Kirehe kakaba gafite ibigo 5 by’amashuri byatangije iyi gahunda y’inkongoro ku mwana.

Abashinzwe ubuzima mu karere ka Rulindo baravuga ko bagiye guhagurukira ikibazo cy’ abanyeshuri baterwa inda, bagahagarika amashuri, bityo inzozi bari bafite zose zikayoyoka.

Gato F. Ushinzwe kurwanya Sida mu karere ka Rulindo

Nk’ uko bivugwa na Gato Frederick ushinzwe kurwanya SIDA muri Rulindo, ngo iyo umwana atewe inda, bituma uvutse ahinduka umutwaro ku muryango kandi n’ uwamubyaye nawe yari atarageza igihe cyo kwitunga.

Ibi kandi ngo bituma umwana watewe inda ahagarika amashuri, rimwe na rimwe bikanamuviramo kwandura indwara zandurira mu mibonano mpuzabitsida idakingiye, maze ntazabashe kwigirira akamaro cyangwa ngo akagirire igihugu.

Mu karere ka Rulindo habarurwa abana bari mu mashuri yisumbuye ndetse no mu burezi bw’ imyaka icyenda bwibanze bagera kuri 14 batewe inda, nk’ uko ubushakashatsi buheruka bwabyerekanye.

Nk’ uko bivugwa na Manirafasha Jean D’ Amour ushinzwe ubuzima muri Rulindo, ngo byaragaragaye ko benshi mu baterwa inda muri aba banyeshuri ari abiga bataha, bityo ababyeyi ndetse n’ abandi bayobozi ku nzego z’ ibanze bakaba bakwiye guhagurukira iki kibazo.

Bamwe  mu rubyiruko rwo mu karere ka Burera rufashwa n’umuryango utegamiye kuri leta wo mu gihugu cy’ubusuwisi witwa “Bleu Ciel” baratangaza ko aho bageze ubu babikesha uwo muryango.

Urubyiruko twaganiriye ni urwiga imyuga mu kigo kigisha imyuga cya Kinyababa giherereye mu murenge wa Kinyababa mu karere ka Burera.  Abenshi twaganiriye ni abiga umwuga wo kubaza muri icyo kigo kigisha imyuga urubyiruko rugera kuri 70.

Niyibizi Fulgence avuga ko atabashije gukomeza amashuri yisumbuye, kuko yagarukiye mu mwaka wa gatatu kubera kubura amafaranga y’ishuri. Ngo iyo atagira “Bleu Ciel” ntiyari kubona aho yiga imyuga. Ngo ariko ubu yiga kubaza kandi yizeye ko bizamugirira akamaro.

Agira ati “ ububaji buzatuma mbona amafaranga yo kwibesha ho”. Akomeza avuga ko narangiza kwiga kubaza akabona amafaranga azasubira kurangiza amashuri yisumbuye.

Nteziyaremye Jean Leon nawe yiga kubaza. Avuga ko nawe atabashije gukomeza amashuri yisumbuye kubera kubura amafaranga y’ishuri. Ngo kwiga kubaza abikesha “Bleu Ciel”. Ngo namara kurangiza kwiga azashinga “Atelier” yo kubaza, izamuha amafaranga yo kwibesha ho.

Harerimana Viateur ni umwe mubahagarariye “Bleu Ciel” mu karere ka Burera ndetse no mu Rwanda. Avuga ko uwo muryango ufasha urubyiruko rutishoboye. Ukaba ukorera mu ntara y’amajyaruguru mu turere twa Burera, Musanze na Gakenke.

Kuri ubu uwo muryango umaze gufasha urubyiruko rugera kuri 800 kwiga imyuga. Uwo muryango kandi ufasha abanyeshuri bagera ku 2500 biga amashuri abanza, ndetse n’abagera kuri 300 biga mu mashuri yisumbuye. Uwo muryango kandi umaze kubaka ibyumba by’amashuri bigera kuri 25.

Harerimana avuga ko uwo muryango watangijwe n’abazungu bo mu gihugu cy’Ubusuwisi. Ngo bagize igitekerezo cyo kuwutangiza ubwo bazaga mu Rwanda  gusura zimwe mu mfpubyi zo mu karere ka Burera, maze bagasanga hari n’abandi bana benshi babaye.

Kuva ubwo ngo nibwo bahise bakora umushinga wo gutangiza Bleu Ciel. Abo bazungu ngo nibo bashaka imfashanyo mu gihugu cyabo bakazohereza mu Rwanda.