Mu rwego rwo kwirinda impanuka zituruka ku miturire mibi, akarere ka Nyamagabe kihaye intego yo gutuza mu midugudu ingo zose zituye ahantu habi hashobora guteza impanuka ziturutse ku biza.
Inkangu ni kimwe byibasira abatuye ahantu habi.
Akarere ka Nyamagabe ni kamwe mu turere dukunze kwibasirwa n’impanuka ziturutse ku biza kubera ahanini imiterere yako igizwe n’imisozi miremire. Mu bihe by’imvura usanga ibikorwa birimo amazu , imihanda n’ibindi bikorwa remezo byangirika ahanini kubera inkangu.
Nko mu murenge wa Musebeya, umwe mu mirenge igize aka karere haherutse kwangirika ibikorwa bitandukanye aho ingo zigera kuri 18 zahuye n’inkangu mu gihe kimwe.
Mu rwego rwo kwirinda ingaruka zitandukanye zaterwa na bene izi mpanuka, ubuyobozi bw’akarere bwasabye abaturage bose batuye ahantu habi kuba bamaze kwimukira mu midugudu mbere y’uko uyu mwaka urangira.
Mu ngo zisaga 72, 861 zituye mu karere ka Nyamagabe, ingo 9,505 nizo zituye nabi. Gusa umuyobozi w’akarere ka Nyamagabe Mugisha Philbert, yadutangarije ko abantu batuye nabi nko ku misozi ihanamye ndetse no mu bishanga aribo bagiye gutuzwa mu midugudu ku buryo bwihuse.
Yagize ati “ turateganya ko byibura mu kwezi kwa 12 uyu mwaka wa 2012, ingo zose bigaragara ko zituye nabi zaba zamaze gutuzwa neza ku buryo bw’umudugudu.”
Mugisha Philbert yatangaje kandi ko igihe cy’amezi 5 atari gito kandi ko haramutse habaye inzitizi zacyerereza iyi gahunda, akarere kakongera igihe ariko abatuye nabi bagatuzwa neza mu midugudu.
Mu gihe haramuka hagize uwanga kwimuka ku bushake, ngo ubuyobozi buzamwegera bumusobanurire ibibi byo gutura nabi ndetse bunamwereke ingaruka zabyo naho abazagaragaza ko nta bushobozi bwo kwiyubakira mu midugudu bafite, akarere kazabibafashamo.