Bahoneza – Kinyarwanda, Rwanda Welfare, Social Welfare, Rwanda People, Nutrition and Diet, Rwanda Habitat, Living in Kigali

Abakorerabushake ba Croix-Rouge y’u Rwanda bakanguriye abaturage bo mu murenge wa Rilima mu Karere ka Bugesera igikorwa cyo kubaka akarima k’igikoni muri gahunda yayo yo gukangurira abaturage kwiteza imbere hagamijwe iterambere rirambye.

Perezida wa Croix-Rouge mu Karere ka Bugesera afatanya n’abaturage kubaka akarima k’igikoni

Rudasingwa Jean Baptise, Perezida wa Croix-Rouge mu Karere ka Bugesera yasobanuye ko nk’umufasha wa Leta, agasozi indatwa kari muri gahunda Croix-Rouge y’u Rwanda yashyize mu mihigo yayo.

Ati “bigamije kuzamura umuturage bakamugeza ku iterambere rirambye umuturage na we yagizemo uruhare,  cyane ndakangurira abaturage kugira isuku bakora  neza imisarane bakayigirira isuku, bakanakoresha kandagira ukarabe mu rwego rwo kurwanya indwara ziterwa n’umwanda”.

Yasobanuye ko abaturage bahawe imirama y’imboga mu rwego rwo kubafasha kurwanya imirire mibi. Yavuze kandi ko hatanzwe inkwavu zigera kuri 240 ku batishoboye mu rwego rwo kubafasha kwiteza imbere kugira ngo bashobore kwikemurira ibibazo nko kwigurira ubwishingizi mu kwivuza (mutuelle de santé). Yavuze kandi ko abaturage bagomba kwitabira guhinga imbuto ku buryo buri rugo ruzajya rugira nibura igiti kimwe cy’imbuto.

Bafasha abaturage kubaka akarima k’igikoni

Rudasingwa Jean Baptise ahamya ko intambwe imaze guterwa ishimishije kuko abaturage bamaze kumva ko na bo bagomba kwishakamo ubushobozi bakagira uruhare mu kwizamura bityo bakazagera ku iterambere rirambye rigamijwe.

Ushinzwe imibereho myiza y’abaturage mu murenge wa Rilima, Umugwaneza Diane, yashimiye ubufatanye bwiza Croix-Rouge y’u Rwanda ifitanye na Leta muri gahunda yo guteza imbere imibereho myiza y’abaturage.

Ati “ iki gikorwa cyo kubaka uturima tw’igikoni kije gufasha abaturage kwiteza imbere, ndashimira Croix-Rouge y’u Rwanda ibyo imaze kubagezaho birimo gutoza abaturage isuku ndetse no koboroza amatungo”.

Nyirimanzi Vincent umwe mu bafashijwe kubaka akarima k’igikoni yashimiye cyane ubufasha bahawe na Croix-Rouge y’u Rwanda. avuga ko bigishijwe, bagirwa inama bahabwa amatungo ndetse n’imbuto.

Umwe muborojwe muri gahunda ya girinka

Imiryango itishoboye yo muri imwe mu mirenge 9 igize akarere ka Gicumbi mu ntara y’amajyaruguru yahawe inka mu rwego rwo kuyifasha kwiteza imbere.

Mwanafunze Deogaratias ushinzwe gahunda ya girinka munyarwanda mu karere ka Gicumbi avuga ko hatanzwe inka 60 zatanzwe ku nkunga y’ikigega gishinzwe gutera inkunga abacitse ku icumu rya Jenoside yakorewe abatutsi yabaye mu Rwanda mu 1994 (FARG).

Avuga ko abahawe inka biganjemo imiryango y’abacitse ku icumu batishoboye, bakomoka mu mirenge ya Mutete, Muko, Rutare, Ruvune, Bukure, Giti, Kajyeyo, Nyamiyaga na Rwamiko.

Umwe mu borojwe, Mukandamutsa Daphrose avuga ko inka abonye izamufasha kubona amata ndetse akabasha kwiteza imbere kuko bizatuma abona ifumbire agafumbira umurima we wari watangiye kurumbuka bityo ugatanga umusaruro. Avuga ko azarushaho kuyifata neza kugirango ibashe kumuha umusaruro.

Gahunda ya girinka munyarwanda yatangijwe na perezida wa repubulika Paul Kagame, ikaba igamije gufasha abaturage bakennye kwikura mubukene.