Bahoneza – Kinyarwanda, Rwanda Welfare, Social Welfare, Rwanda People, Nutrition and Diet, Rwanda Habitat, Living in Kigali

Ubuyobozi bw’akarere ka Burera buratangaza ko imikorere y’inkera gutabara igiye kuvugururwa nyuma yo kubona ko uburyo zari zisanzwe zikoramo burimo ibibazo.

Icyo cyamezo cyafashwe ubwo habaga inama y’umutekano y’akarera ka Burera tariki ya 02/02/2012.

Muri iyo nama bemeranyijwe ko hagiye gushakwa uburyo imikorerere y’inkeragutabara yaba imwe mu karere kose, Kuko ngo ubundi buri murenge niwe wishyiriragaho gahunda y’imikoranire nazo.

Hari n’imirenge imwe nimwe itari yarashakiye impuzangano (uniformes) izo nkeragutabara, kuburyo umuntu atabasha  kuzitandukanya n’abandi bantu basanzwe. ibyo byose ngo byatezaga ikibazo kuburyo iyo habaga ubujura hari igihe abaturage bavugaga ko inkeragutabara zabigizemo uruhare.

Zadohotse ku nshingano zazo

Abayobozi b’imirenge bari bitabiriye iyo nama bagaragaje uburyo zimwe mu nkeragutabara zikorera mu mirenge yabo zituzuzaga inshingano zazo zo kurinda umutekano mu dusantere dukorerwamo ubucuruzi.

Uwamahoro Julienne umunyamabanga nshingwabikorwa w’umurenge wa Gahunga mu karere ka Burera yavuze ko inkeragutabara zarindaga mu gasantere ka Gahunga zatangiye zikora neza ariko nyuma ziza guteshuka.

Agira ati “ batangiye barinda iyo santere ari 18 biza kurangira ari bane gusa kuko baje kubigira business”. Akomeza avuga ko santere ya gahunga ari nini kuburyo abantu bane batari kuyirinda ngo bayishobore.

ibyo byatumye abajura batera muri ako gasantere babomora inzu y’umuturage batwara amamashini yose adoda yakoreshaga. Maze uwo muturage arihisha izo nkeragutabara.  Uwamahoro avuga ko kuba barazirihishije bagendeye ku masezerano bagiranye.

Agira ati “ twasezeranye ko nibazajya bibwa bazajya bariha ibyo bibwe byose”. Akomeza avuga ko buri muryango ucururizwamo muri ako gasantere utanga amafaranga y’u Rwanda ibihumbi bibiri (2000frws) buri kwezi. Yongera ho ko kuba barabonaga amafaranga menshi aribyo byatumye babigira business.

Icyo kibazo cy’ubujura kandi cyanagaragaye mu murenge wa Kinoni mu karere ka Burera aho abajura bateye imwe mu masantere yo muri uwo murenge barahiba, Maze inkeragutaba zaharindaga ziriruka bituma bazifata barazifunga bakeka ko arizo zahibye.

Uhagarariye inkeragutabara mu karere ka Burera witwa Hitimana Filipe avuga ko ibibazo bitandukanye byagiye bigaragara byatewe n’uburangare. Gusa ariko ngo ikibazo cy’agahimbaza musyi nacyo ngo n’ingorabahizi, akaba yizeza ko bizahinduka mu gihe bazaba bafite imikorere ihamye.

Zaraduhaye Joseph umuyobozi wungirije w’akarere ka Burera ushinzwe ubukungu n’iterambere, afatanyije n’abashinzwe umutekano muri ako karere  basabye Hitimana kuba imboni z’inkeragutabara, Aho agomba kubaba hafi akagenzura imikorere yazo mu mirenge zikoreramo.

Basabye kandi imirenge ifite inkeragutabara zidafite impuzangano (uniformes) ko mugihe kingana n’ukwezi bagomba kuba bazibashakiye.

Ikindi ubuyobozi bw’akarere ka Burera bwavuze ni uko bugiye kureba uburyo inkerabgutabara muri ako karere hose zigira imikorere imwe aho kubiharira imirenge gusa.

Abaturage bari kubyina nyuma y’imihigo y’urugo

Mu rwego rwo kugera ku iterambere rirambye abaturage bo murenge wa Bwisige mu Karere ka Gicumbi bahize imihigo y’urugo hanashyirwaho gahunda ya njyanama y’urugo.

Iki gikorwa cyabaye kuri uyu wa 23 Ukuboza 2011 Umunyamabanga nshingwabikorwa w’umurenge wa Bwisige Ngezahumuremyi Theoneste   yavuze ko iyi gahunda y’imihigo y’urugo yateguwe mu rwego rwo gufasha abaturage kugira gahunda  ihamye y’ingo zabo no kubafasha kubasha kubaho bafite intego mu miryango yabo. Buri muturage akaba yarahize imihigo igera mu icumi agomba kuzakorera urugo rwe.

Nsanzurwimo Antoine ni umgabo w’imyaka 47 hamwe n’umuryango we ndetse n’imiryango y’abatuye muri uyu murenge batangaje ko iyi gahunda y’imihigo y’urugo izabageza kuri byinshi mu rwego rwo kubaho bafite intego bagamije kugeraho mu miryango yabo.

Ikindi ni uko Basanga iyi gahunda izabafasha gukora cyane bakiteza imbere ndetse hakabaho n’impinduka mu mibanire y’ingo zabo kuko benshi muri bo umwe ari umujyanama wa mugenzi we.

Iyi gahunda y’imihigo y’urugo ijyanye na gahunda iri muri uyu murenge bise “njyanama y’urugo” ikazafasha abaturage kugirana inama ndetse bagafashanya gukemura ibibazo n’amakimbirane arangwa mu miryango yabo.

Njyanama y’urugo kandi ngo izabafasha kugirana inama mubyo bakora byose kuko urugo rumwe ni umujyanama w’urundi.

Umuyobozi w’Akarere wungirije ushinzwe imibereho myiza y’abaturage Mujawamariya Therese avuga ko iyi gahunda izagera mu mirenge yose y’Akarere ka Gicumbi hagamijwe guteza imbere imibereho myiza y’abaturage binyuze mu mihigo y’urugo no muri njyanama y’urugo.

Muri iki gikorwa cyo guhiga imihigo y’urugo no gushyiraho njyanama y’urugo hanashojwe itorero ryo kurwego rw’umudugudu; hatangwa n’imyambaro y’abahwituzi ndetse n’abaturage bahabwa umwanya wo gucinya akadiho.