Abaturage bo mu kagali ka Busigali mu Murenge wa Cyanzarwe akarere ka Rubavu barasaba ko bagenerwa amazi meza bagashobora kurwanya umwanda n’indwara ziwukomokaho.
Abaturage bakaba babitangaza nyuma y’uko umushinga wari usanzwe ugezaho amazi meza Aquavirunga yari yaragiranye amasezerano n’akarere ka Rubavu ibahakaniye kongera kubaha amazi kuva mu kwezi kwa munani 2012.
Bamwe mubatuye muri aka kagari babitangaza ni abantu bakuze bavuga ko badafite ubushobozi bwo gukorera amafaranga ngo bashobore kwigurira amazi, bakavuga ko ingaruka zo kubura amazi meza ari umwanda ubugariza.
Abaturage bo mu kagari ka Busigali banavuga ko kutagira irimbi bashyinuramo bibagora bagasaba ko bishobotse inzego z’ubuyobozi zababa hafi maze bakabona aho bashyingura.
Abaturage batuye akagari ka Busigali ni bamwe mubakuwe mu ishyamba rya Gishwati no mu nkengero zaryo batuzwa ahitwa Kanembwe, bamwe muri aba baturage ntibishoboye harimo n’ basigajwe inyuma n’amateka badafite ubushobozi biganjemo abasaza n’abakecuru batagishoboye no kwicira inshuro.
Nubwo abaturage bavuga ko babuze amazi meza, bacyeneye kwegerwa n’abajyanama b’ubuzima bakabereka uburyo bakwiye kugirira isuku ingo zabo no gutegura amazi no kugirira isuku aho batuye kuko usanga abenshi baba bagaragaraho umwanda.
Ikibazo cy’amazi n’abatishoboye mu kagari ka Busigali, umuyobozi w’akarere wungirije ushinzwe imibereho myiza y’abaturage Nyirasafari Rusine Rachel avuga ko kizwi ariko hategurwa ko uyu murenge washyirwa muri VUP ukaba wafasha abaturage guhindura imibereho mu iterambere no kubona amazi meza, avuga kandi ko ikibazo abaturage bavuga ko bacyeneye irimbi nacyo kizwi ariko hagishakishwa aho ryashyirwa.
Nyirasafari avuga ko abajyanama b’ubuzima bakwiye kwegera abaturage hamwe n’abayobozi b’inzego z’ibanze mu kubafasha kwigirira isuku hamwe no kugira imibereho myiza cyane ko benshi mubajyanama n’abayobozi b’ibinzego z’ibanze bafite ubumenyi bwo gufasha abaturage.