Bahoneza – Kinyarwanda, Rwanda Welfare, Social Welfare, Rwanda People, Nutrition and Diet, Rwanda Habitat, Living in Kigali

Abenshi mu batunzwe n’uyu murimo wo gutashya ni abagore batuye ahitwa ku Kinteko ho mu Murenge wa Save, Akarere ka Gisagara. Izo nkwi bacuruza, ahanini bazitoragura mu ishyamba rya Kaminuza Nkuru y’u Rwanda, rizwi ku izina rya Arboretum.

Inkwi aba bagore batoragura zigizwe ahanini n’ibitovu biba byaratemwe igihe cyo gukorera iri shyamba, hanyuma bikahumira. N’ubwo bahatoragura izi nkwi ariko, ngo bagenda bacungana n’abarinzi b’iri shyamba kuko iyo babafashe bazibambura bakanabakubita.

Ngo abababuza kuhatashya bavuga ko bakwiye kureka ibyo biti bikaba ifumbire y’ishyamba. Uretse ko baba bananga ko baretse abantu bakaza gushaka inkwi uko bishakiye muri iri shyamba bajya banatema ibiti bigize ishyamba nyir’izina.

Inkwi abagore batashya muri iri shyamba rero, ngo baragenda bakazigurisha n’abatajya gutashya ku buryo umuba uringaniye uvamo amafaranga igihumbi (1000). Icyakora, abajyayo bahetse abana bo ntibabasha kwikorera nyinshi, ku buryo bakuramo nka 600.

Ubusanzwe rero, aba bagore bakora umurimo wo guhingira abaturanyi dore ko ubutaka bwabo bwo ari butoya cyane. Iyo babuze ibiraka byo guhinga rero, ni bwo bemera bakishora mu ishyamba, bagira amahirwe ntibahure n’abarinzi baryo, ni uko amaramuko akaba arabonetse.

Kuba ari abagore batashya muri iri shyamba, si ukuvuga ko n’abagabo batabyifuza. Gusa ngo iyo babafashe babamerera nabi kurusha uko bagenzererza abagore, kuko bo ngo “bafite imbaraga, bakaba bashobora no gutema ibiti by’ishyamba”.

Umuyaga utuma babona inkwi

Mu gihe umuyaga uhuha ari mwinshi abahinzi, cyane cyane abafite insina z’ibitoki, bakifata mapfubyi kuko baba bazi ko biri bushirire hasi, aba badamu batashya bo ngo iyo umuyaga uhushye baba bongeye bariye! Umwe muri bo yagize ati “twe ntidushobora kurira ngo tujye kumanura amashami y’ibiti aba yarumye. Iyo umuyaga uhushye ari mwinshi, inyayu zihubuka ari nyinshi maze kubona inkwi ntibitugore”.

Abaturage bo mu tugari twa Buhoro n’Agasharu bavuga ko bagiye gutera ibiti ku bwinshi imbere y’amazu yabo, kugirango bizajye bigabanya umuyaga ushobora kongera kwibasira amazu ya bo. Iki cyemezo bagifashe nyuma y’uko imvura ivanze n’umuyaga bibasenyeye amazu ndetse na hegitari zigera kuri 23 z’urutoki rw’abo baturage zikahangirikira.

Abo baturage babwiye abakozi ba minisiteri y’imicungire y’ibiza n’impunzi babasuye ku itariki 28/3/2012 ko bagiye gukaza umurego mu kongera ibiti byinshi aho bitari, dore ko menshi mu mazu yasenyutse asa n’ari ku gasozi ku buryo nta biti bihari byatangira umuyaga.

Bavuga ko kuba amazu yabo yarasenyutse mu cyumweru gishize byabaye nko kubahwitura kugira ngo bakore ibyo batahaga agaciro.

“Ubundi umuntu yibuka gukinga ari uko yibwe. Natwe rero ntitwanatekerezaga ko hari umuyaga ushobora kuza ukadusenyera bene aka kageni…ubwo tumenye ko umuyaga ubugiramo uruhare, tugiye kuwuhagurukira byanze bikunze” uku niko umwe muri abo baturage yabisobanuye.

Umukozi wa minisiteri y’imicungire y’ibiza n’impunzi. Ntaribi Theogene, yavuze ko minisiteri y’imicungire n’ibiza ifite amabwiriza y’uko abaturage muri buri ntara bajya bubaka hakurikijwe imiterere y’intara batuyemo.

Yagize ati “Hari nk’ahantu usanga hakunze kuba inkangu, cyangwa kakaba ari agace karangwamo umuyaga ukomeye cyangwa se ibindi biza bitewe n’agace. Ayo mabwiriza asaba ko mu gihe umuntu yubaka ahantu agomba kubanza kwiga ibyo byose kugira ngo yubake inzu ishobora kubyihanganira”

Minisiteri y’imicungire y’ibiza n’impunzi ku ikubitiro yatabaye abo baturage ibaha amabati yo gusakara kuko amazu amwe ibisenge byayo byari byagurutse. Mu turere twa Kayonza na Rwamagana, iyi minisiteri yatanze amabati agera ku 3253 ku bantu bari basenyewe n’imvura n’umuyaga.

Abaturage bahawe ayo mabati bavuga ko bayishimiye cyane ndetse “binarushaho gutuma bongerera icyizere leta kuko babonye ko izirikana abaturage bayo” nk’uko babyivugiye.