Bahoneza – Kinyarwanda, Rwanda Welfare, Social Welfare, Rwanda People, Nutrition and Diet, Rwanda Habitat, Living in Kigali

Kakuze Ancila,umukecuru utuye mu mudugudu wa Rwintare,akagari ka Gako,umurenge wa Rusiga,avuga ko yunva ari we munyarwanda ushobora kuba atuye mu nzu ishaje kurusha abandi banyarwanda.

Iyi nzu ye uyinjiyemo ushobora kureba mu kirere kubera imyenge iri mu gisenge cyayo,iki gisenge kikaba gisakaje amabati. Avuga ko iyi nzu yayubakiwe mu gihe ngo nawe atibuka neza,ngo ikaba ishaje.

Iyi nzu kandi ifite n’ikibazo cy’uko yahomotse cyane kubera amahuhwezi y’ invura,ubona ibitaka byarashizeho hagaragara ibiti bihagaze.

We kuba aba mu nzu ishaje ngo ntacyo bimubwiye ,kuko ngo n’ubundi ngo nawe arashaje,nk’uko abyivugira.Ahubwo ikimuteye impungenge ngo ni abuzukuru be bagera ku icumi abana nabo.Ngo ahora afite ubwoba ko invura ibaye nyinshi,iyi nzu ishobora kuba yabagwaho.

Abana abana nabo ,ngo ni abana b’abakobwa be bagenda babyara hanyuma bakabamuzanira,ngo abarere.

Aragira ati”iyi nzu izatugwaho rwose kuko n’iyo invura iguye ntituryama .kuko biba bimeze nko kwiryamira hanze.Jye mbabazwa cyane n’utu twuzukuru twanjye, iyi nzu mbona izatugwaho .none se nanategereje ko n’ubuyobozi bwangeraho ngo bumpe umuganda wo kuyisakara ngaheba”.

Aba bana uko baba muri iyi nzu ngo ni icumi hamwe na nyirakuru wa cumi n’umwe ,nta n’umwe ufite  Mituweri muri bo.umukuru muri aba bana afite imyaka cumi n’umwe .

Nyirakuru avuga ko bane muri bo ari bo bari bafite mituweri , none ngo nayo yararangiye, kugeza ubu nta yandi mafranga bari babona.

Uyu mukecuru  ariko avuga ko yahawe ihene mu budehe, mu rwego rwo kugira ngo abashe kwikura mu bukene,gusa ubona bidahagije kuko kugeza ubu iyo hene ntiyari yabyara,ikindi kandi ararana nayo mu nzu ,kuko nta kiraro igira.

Uretse ko ngo nawe aba afite impungenge z’uko bayimwiba akabura byose ,noneho  agahitamo kurarana nayo mu nzu.

Mukecuru akaba asaba ubuyobozi ,cyangwa se udi mugiraneza waboneka kuba yamufasha kumusanira iyo nzu,nawe akaryama atavirwa

Nyirandagijimana Godereva utuye mu kagali ka Rwikubo umudugudu wa kivugangoma  avuga ko yagabiwe ihene n’umuyobozi w’umurenge wa Rurenge kubera ibibazo afite.

Nkuko  Nyirandagijimana abivuga ngo  yabyaye umwana we wa mbere amaze iminsi itatu apfushije umugabo none uwo mwana yabyaye amaze umwaka n’ amezi atandatu afite ibiro bine gusa kandi arwaye umutima.

Uyu mugore ugaragara nk’utifashije ngo umwana we ntago akura kandi ntashobora kumuheka kuko amagufa yo mugituza uko ameze bidasanzwe kandi ngo iyo abigerageje umwana amererwa nabi.

Kudakura k’uyu mwana ariko ntiwashidikanya ko bitarimo no kutabona indyo yuzuye kuko uretse kuba yaragabiwe n’ umurenge ihene ngo imufashe ,ubu ahabwa ubundi bufasha kwa muganga burimo ifu y’ igikoma.

Yagize ati”Kwa muganga bansabye kurya neza ngo umwana yiyongere kuko nageze  muri CHUK bambwira ko umwana batamubaga  atarageza kubiro 12.”

Uyu mwana ngo yarwaye umutima amaze ibyumweru bibili,none ubu afite umwaka n’amezi atandatu.

Umuyobozi w’umurenge wa Rurenge Muragijemungu Arichade ubwo hasozwaga ukwezi k’ umuryango yatangaje ko mu rwego rwo guca imirire mibi hatangijwe gahunda muri buri mudugudu yo kwigisha ababyeyi gutunganya indyo yuzuye.

Ikibazo cy’ imirire mibi kigenda kigaragara hirya no hino mu byaro nubwo usanga ariho ibiribwa biva kuko aribo baba babihinze.

Kutarya neza akenshi bikaba biterwa n’imyumvire  aho usanga banga kurya amagi  ndetse n’ inkoko ngo ni ayakire bakayagurisha ikindi ngo ni ubumenyi buke mugutegura amafunguro.

Urubyiruko rwibumbiye mu ishyirahamwe riharanira guteza imbere imikino n’imyidagaduro mu karere ka Ngororero rimaze igihe gito rivutse ryatangiye ibikorwa byo gufasha mu kubakira abatishoboye batuye mu murenge wa Ngororero ari naho icyicaro cyaryo giherereye.

Mu karere ka Ngororero hagaragara ukutitabira imikino haba kubantu bakuru ndetse no ku rubyiruko bitewe ahanini no kutagira ibikorwa remezo nk’ibibuga by’imikino itandukanye. Mu rwego rwo gushishikariza abatuye aka karere kwitabira sport no gukora ubuvugizi mu gukwirakwiza ibibuga hirya no hino, urubyiruko rwo muri aka karere rwishyize hamwe maze rushinga ishyirahamwe ryitwa Ngororero Sport association.

Nkuko umuyobozi w’iri shyirahamwe bwana Habarurema Vincent de Paul akaba asanzwe ari n’umukozi w’akarere ushinzwe ubujyanama mu by’amategeko yabidutangarije kuri uyu wa 24/8/2012, ubwo twabasangaga aho bubakiraga umukecuru usanzwe abana n’abuzukuru be munzu ntoya kandi bigaragara ko ishaje, ngo urwo rubyiruko rwasanze nyuma yo gukora imikino itandukanye rugomba no gufasha Leta byumwihariko akarere kabo kugera kuntego kiyemeje, bityo bakaba bariyemeje kubakira umwe mubakene bategereje kubakirwa n’akarere.

Habarurema avuga kandi ko kubera ko bamaze igihe gitoya batangije iryo shyirahamwe batangiriye ku mukino w’umupira w’amaguru ndetse n’uwintoki witwa baskeball ariko bakaba bazakomeza kwagura no muyindi mikino itandukanye. Barigiriki Bonifirida w’imyaka isaga 90 nubwo atibuka neza igihe yavukiye, yatugaragarije ibyishimo by’uko yabonye abantu bamukunda kandi ari abana bato maze avuga ko abasabira umugisha ndetse ngo kuva bariyemeje kumwubakira inzu yisanzuye afite n’icyizere ko azabona n’inka yo kumukamirwa nkuko yabigaragaje mu magambo ye.

Perezida w’inama y’Igihugu y’urubyiruko mu murenge wa Ngororero Biseruka Robert  avuga ko imbaraga urubyiruko rufite ruzazikoresha mu kubaka igihugu hatezwa imbere ibyagirira abaturage akamaro kandi ngo bakazajya babikora bifashishije imikino itandukanye. Iryo syirahamwe rimaze gusa amezi 2 rikaba rimaze kugeza ku banyamuryango 40.

Mu muganda rusange ngarukakwezi wabaye tariki ya 28/07/2012, urubyiruko rukorera mu mahuriro atandukanye yo ku kigo cy’urubyiruko cya Nyamasheke (NYFC) ku bufatanye n’abakozi b’icyo kigo bafashije umukecuru utishoboye bamusanira inzu ye nyuma y’uko yari yarasenyutse.

Umukecuru wafashijwe muri uyu muganda ni uwitwa Kamagaju uzwi ku izina rya Karizabajeni, akaba afite uburwayi bw’igicuri bukunze kumufata ku buryo yahiye ahantu henshi ku mubiri we kubera igicuri kigenda kimutura mu muriro, ubu akaba atunzwe no gusabiriza.

Ubusanzwe Kamagaju yari afite inzu y’ibyumba bibiri n’uruganiriro rumwe ariko icyumba kimwe kikaba cyaraguye. Uru rubyiruko rukoresheje imbaraga zarwo rwakuyeho ayo matafari yari yarasenyutse maze rutunganya icyumba kimwe n’uruganiriro rwari rusigaye ngo asigare aribyo aba akoresha.

Gukora umuganda no gufasha abatishoboye ngo ni bimwe mu byo NYFC yigisha urubyiruko muri gahunda yo kurukundisha igihugu no kugira uruhare mu kucyubaka nk’uko umuhuzabikorwa wa NYFC, Ndanga Janvier abitangaza.

Akomeza avuga ko urubyiruko rwahisemo kuzajya rukora umuganda ukwarwo maze rugafasha umwe mu batishoboye mu mirimo y’amaboko. Uyu muganda wo gufasha abatishoboye ngo uzajya uba buri kwezi, gusa ngo urubyiruko rwifuza ko wajya uba kabiri mu kwezi kugira ngo batange umusanzu ugaragara mu kubaka igihugu, ubuyobozi bwa NYFC bukaba buri kwiga uburyo byazashyirwa mu bikorwa.

Gusa ngo kubera ikibazo cy’amikoro, batangiriye ku baturage batuye hafi y’iki kigo hanyuma indi mirenge ikazagerwaho nyuma igihe hazaba harabonetse uburyo bwo kuhagera.

Ndanga atanga ubutumwa ku rubyiruko avuga ko rusabwa kureba aho igihugu kigana rukagira uruhare mu kucyubaka dore ko ari rwo rwinshi kandi rufite n’imbaraga zo gukora. Akomeza avuga ko urubyiruko rudakoze ngo ruteze iguhugu imbere ntaho cyagera.

Asaba kandi ababyeyi kureka abana nyuma yo gukora imirimo yo mu rugo bakagana ikigo cy’urubyiruko kuko aribo kigenewe kandi kikaba kinatanga inyigisho zirebana no kurinda ubuzima bwabo ku bana bose bitewe n’icyiciro barimo kandi kikanabatoza gukora.

Nyuma y’igikorwa cy’umuganda urubyiruko rwanahawe ibiganiro ku masomo agamije kubaha ubumenyi mu buryo bwo kwirinda indwara zandurira mu mibonano mpuzabitsina na Sida, gutwara inda zitateguwe, ibiyobyabwenge n’ibindi bishobora kubangiriza ubuzima.

“Burya gukene kubi ni ugukena mu mutwe cyangwa kutagira ubwenge”. Iyi ni interuro y’umugore witwa UWITIJE Francine utuye mu mudugudu wa Gitarama, akagari ka Kabarondo mu murenge wa Bwira ho mu karere ka Ngororero, ubwo twamusangaga mu rugo iwe avuye gushaka ibyo guteka aho avuga ko aca incuro.

Uwitije ufite imyaka 41 y’amavuko  ni umwe mu baturage 7000 bashyizwe ku rutonde rw’abakene bakeneye ubufasha bwihutirwa mu karere ka ngororero, akaba ari umupfakazi ufite abana 3. Ubusanzwe mu buzima bwe n’abana be, babaga mu icumbi aho bishyuraga gutanga imibyizi ku babacumbikiye maze baza gushyirwa ku rutonde rw’abantu bakeneye ubufasha bwa Leta kuva mu mwaka ushize wa 2011. Nyuma yo kwemererwa kubakirwa inzu, ubuyobozi bw’umurenge wa Bwira hamwe n’abaturage barayizamuye ariko igeze hejuru (icyo bita ikigega) habura isakaro niko guhagarika imirimo bategereje kubona ibiti, imisumari ndetse n’isakaro.

Uwitije Francine iruhande rw’inzu ye

Amaze kubona ko bizamutindira kubona inzu yo kubamo kandi abana be bamaze kuba abasore n’inkumi dore ko umukobwa we mukuru afite imyaka 20, Uwitije yafashe icyemezo cyo kwirangiriza imirimo isigaye kuri yanzu maze akava mu icumbi. Nkuko yabidutangarije, icyo gihe nta mafaranga ageze ku 1000 yashoboraga gupfa kubona. Nyuma nibwo yigiriye inama yo gushaka abantu bamufasha kurangiza inzu ye maze abisaba umu pasiteri witwa Ntamabyariro Matiyasi wo mu itorero rya ADEPR, maze amwemerera ko nabona inzugi nawe azamusakarira.

Nyuma yo kubyemera ariko atazi aho azazikura, Uwitije n’abana be biyemeje gupagasa nkuko byari bisanzwe ariko bakajya batungwa n’ibyakorewe n’umuntu umwe kuri batatu bari bashoboye guhinga maze ibyo abandi 2 bakoreye bakabyegeranya ibyo bimara igihe cy’ukwezi, baba bamaze kubona amadirishya 4 n’inzugi 2, maze basaba pasiteri ko yabasakarira nkuko yabibasezeranyije nawe ababera imfura arabikora ku bufatanye n’umurenge batuyemo.

Uwitije avuga ko hari abategereje ko bazahabwa byose 100% maze bagahura n’ibibazo by’igihe kirekire we yarageze munzu. Nubwo iyo nzu atarabasha kuyibonera inzugi z’imbere, uyu mugore avuga ko azabigeraho kuko afite amaboko n’ubwenge Imana yamuhaye. Kuri ubu, akarima gato uyu mugore afite kezemo ibishyimbo kandi gahinzwe mo indi myaka itandukanye ndetse akaba yaranazituriwe ingurube imufasha kubona ifumbire.

Ashima cyane iyi Leta ngo yita ku bakene, yagize ati” ndagaya abantu badakora bagategereza kurya ibyo bahawe gusa kandi bafite amaboko, kuri njye gukena kubi ni ugukena mu mutwe cyangwa kutagira ubwenge, naho ubundi mbonye intangiriro nanjye ngomba kwirwanaho”. Uyu mugore anashimira Leta imurihirira ubwisungane mu kwivuza, ariko akanongeraho ko Imana nayo yamushinganye kuko we n’abana be bamaze imyaka 3 ntanumwe urajya kwa muganga kuko ngo batarwara.

Umunyamabanga nshingwabikorwa w’umurenge wa Bwira Kavange J d’Amour nawe yemeza ko uyu mugore ari urugero rw’umukene wakira ubukene bwe ariko anarwana no kuzabuvamo atagendeye gusa ku nkunga za Leta n’abagiraneza, ariko ubuyobozi nabwo bukazakomeza kumuba hafi.

Nakabonye Catherine(iburyo) n’umwana we yatoraguye akamurera.

Nakabonye Catherine, umwe muri ba ‘Malayika Murinzi’ bo mu karere ka Nyamagabe yatoraguye umwana mu mashyamba ya Kongo yemera kumurera nyuma biza kumuviramo kubengwa n’abasore benshi n’aho aboneye umugabo arabimuziza.

Mu 1994 nibwo uyu mugore yatoraguye uruhinja mu mashyamba yo mu gihugu cya Repuburika Iharanira Demokarasi ya Kongo, uyu mugore akimara kubona uru ruhinja avuga ko rwari rurwaye rumeze nabi, ngo yahise yemera kurutwara akarurera.

Nyuma ngo Nakabonye ageze mu Rwanda n’umwana we yari yatoraguye ubuzima ntibwaboroheye kuko uyu mwana yari yararwaye bikabije bigatuma ndetse bombi bahabwa akato, ibi byose ngo byamubayeho nawe akiri muto kandi nta mikoro afite.

Ati “ nta mubyeyi nagiraga ngo abe yamfasha, namureraga nanjye nakagombye kurerwa ariko nkabona ntaho n’ubundi uyu mwana namwohereza”.

Uretse guhabwa akato kandi ngo Nakabonye nk’umukobwa wari ukeneye umugabo, yakomeje kubengwa n’abasore batandukanye bavugaga ko  uyu mwana yari uwe.

Nakabonye ngo ubuzima bwaje kumugora ku buryo yagerageje kwiyahura aho yanyweye imiti yica ariko ntiyapfa.

Nyuma yo kurusimbuka,uyu mubyeyi wari ukiri umukobwa yaje kubona umugabo barabana ndetse ajyana n’umwana we yari yaratoraguye kubana n’umugabo yari amaze gushaka. Nakabonye avuga ko nta handi yari gusiga uyu mwana kuko nawe ubwe nta mubyeyi yari afite ngo abe yamumusigira.

Bidatinze uyu mugabo yirukanye Nakabonye amuziza ko uyu mwana yari afite ari umwana we. Nyuma yo kwirukanwa ariko ngo Nakabonye ntiyacitse intege ahubwo yagerageje kureba uburyo yakoresha kugira ngo we n’umwana we yari yaritoraguriye babashe kubaho.

Nibwo yaje gukodesha inzu atangira gucuruza uducogocogo hanyuma ubuzima burakomeza kugeza ubwo umugabo we wari waramwirukanye yongeye kumucyura ubu  bakaba babanye neza nk’uko Nakabonye abitangaza. Uyu mwana nawe yiga mu mwaka wa mbere w’amashuri yisumbuye.

Abaturanyi ba Nakabonye bo  ngo basanga ibyo uyu mubyeyi yakoreye uyu mwana yari yatoraguye ari nko kumupfira.

Kubera urukundo yakunze umwana yatoraguye, Nakabonye yahawe icyemezo cy’ishimwe n’abayobozi b’akarere ka Nyamagabe. Umuyobozi w’akarere wungirije ushinzwe ubukungu, Mukarwego Umuhoza Immaculee we asanga  Nakabonye yagombye kubera urugero rwiza abandi babyeyi nabo bakakira abana badafite uko bameze mu miryango yabo.

Ubuyobozi bw’akarere ka Gatsibo butangaza ko buzafasha Mukamponga

Annociata kubona amata yo kurera abana 3  b’abakobwa yibarutse tariki

27/05/2012.

Ubwo twamusangaga mu bitaro bya Ngarama yatangazaga ko

ahangayikishijwe n’imibereho ye n’abana cyane ko asanga adafite

ubushobozi bwo kurera aba bana bitewe n’umutungo mucye.

Habarurema Isae abazwa n’abaturage icyo akarere kamuteganyiriza

asubiza ko ubuyobozi bw’akarere bwamaze kuganira n’umurenge kandi hari

ibikorwa.

Umunyamabanga nshingwabikorwa w’umurenge wa Ngarama akaba atangaza ko

umurenge wamaze gutegura ubwisungane mu kwivuza bw’abana umwaka wa

2012-2013 naho kubona amata ngo k’ubufatanye bw’akarere na police mu

gutangiza icyumweru cya police ari mubaturage bazagenerwa inka kandi

inka zitangwa zikaba zifite amezi bikazamufasha kubona amata yo guha

aba bana.

Mukamponga Annociata wibarutse abana 3 akaba yarakiriwe neza

n’abaturage n’abaganga bo mu bitaro bya Ngarama bakomeje kumuba hafi

no kumusura bamukomeza kuko acyeneye abamwitaho kugirango ashobore

kwita kubana be, benshi mubabyeyi bavuga ko kubyara abana 3 ari

umugisha yahawe n’Imana nubwo adafite ubushobozi ngo abaturage

bazakomeza kumuba hafi.

Kuba ubuyobozi bumugeneye ubwisungane mu kwifuza bw’abana ndetse

akagenerwa n’inka biri mubizamwunganira kugira imibereho myiza no

kwita kubana uretse ko umurenge uvuga ko utazagarukira aho kumufasha

cyane nk’umuturage wabo ahubwo bazamuba hafi.

Mukamponga Annociata akaba Atari uyu murenge witayeho kubera ko

yabyaye abana 3 kuko no muri  2011 hari undi mubyeyi umurenge wari wafashije

kugera asubiye iwabo mu karere ka Bugesera.

Umuryango w’ivugabutumwa Eagle Ministries  wo mu itorero rya EDAR ryakoresheje amafaranga arenga miliyoni imwe n’ibihumbi magana atatu mu gikorwa cyo gusana inzu y’umukecuru Nyiramugwahashahe Alivera utuye mu mudugudu wa Ryabega akagari ka Rutaraka ho mu Murenge wa Nyagatare.

Uyu mukecuru uvuga ko kubera uburyo akuze atibuka imyaka afite ariko ugenekereje ukaba wabona ko ari mu kigero cy’imyaka nka 85 yarokotse Jenoside yakorerwe abatutsi kandi akaba arera impfubyi enye na zo zarokotse Jenoside avuga ko yahoraga atakambira ubuyobozi ndetse na Ibuka ko bamwubakira nyamara ngo ntibishoboke. Kubera iyo mpamvu akaba yagize ati « Ndashimira cyane aba bana bigomwe bakaza kunyubakira buriya bimpaye icyizere ko n’isakaro nzaribona kuko iyi nzu iranava. »

Ubwo bapondaga sima abandi bubaka wabona abaririmbyi ba Eagle Ministries barimo abasore, abagabo ubona bakuze ndetse n’abagore bafite umurava udasanzwe bavuga ko bifuza ko iyo nzu mu minsi ibiri bagomba kuba bayirangije. Umwe muri bo yagize ati « Amakuru twari dufite ni uko uyu mukecuru hari hashize hafi imyaka umunani bamurerega ko bagiye kumwubakira ariko ntibabikore. Iki gikorwa rero turagikorana ibyishimo n’ishema kuko ni igikorwa cy’urukundo. »

Cyakora Ubuyobozi bwa Eagle Ministries buvuga ko bwafashe icyemezo cyo kubakira uyu mukecuru bubisabwe n’akarere dore ko bo batari banamuzi. Deborah avuga ko amafaranga basanisha inzu y’uyu mukecuru yaturutse mu bwitange bw’abasengera muri Eagle Ministries aho buri wese yatangaga akurikije ubushobozi bwe. Yagize ati « Urukundo ni rwo rugomba kuranga buri wese by’umwihariko abakora imirimo y’Imana. »

Muri metero nk’eshanu gusa, Cyatengwa Jeanne d’Arc, umuturanyi wegeranye neza na mukecuru Nyiramugwahashashe Alvera avuga ko ashima cyane umutima Eagle Ministries yagize yo kubakira uyu mukecuru kuko ngo izu yabagamo wabonaga itamubereye. Agira ati « Iyi ntago yari inzu y’umukecuru nkuriya utagishoboye kugira icyo akora kandi anayirereramo impfubyi enye. »

Gakwaya Antoine, Umuyobozi w’Umudugudu wa Ryabega, uyu mukecuru atuyemo na we avuga ko yishimiye cyane abafatanyabikorwa babatera inkunga mu kubakira uyu mukecuru. Akomeza avuga ko mu bushobozi bw’abaturage bari barakoze uko bashoboye bamwubakira umusarani ufite agaciro k’amafaranga ibihumbi mirongo itanu.

Inzu ya Nyiramugwahashashe Alvera ifite ibyumba bitatu n’uruganiriro. Yubakishije amatafari ya rukarakara ikaba yari iteye igishahuro cy’igitaka wabonaga kimaze gusaza kuko ku gice kinini cyari cyaravuyeho ari amatafari ashinyitse. Byongeye iyi nzi nta sima yari iyirimo hasi yewe nta n’umuriro mu gihe umudugudu irimo ufite umuriro w’amashanyarazi. Eagle Ministries ikaba irimo kuyisana iyitera igishahuro cya sima banashyira sima hasi mu nzu. Iyo nzu kuri ubu bayishyizemo amashanyarazi ndetse baka ngo bazanayitera irangi.

Uretse gucunga umutekano, inkeragutabara zigaragara no mu bindi bikorwa biteza imbere igihugu.

Inkeragutabara zo mu karere ka Nyamagabe zatangije igikorwa cyo kubakira inzu umukecuru Mukarugomwa Marie wasenyewe n’ibiza mu murenge wa Cyanika.

Uyu mukecuru wasizwe iheruheru na Jenoside yakorewe Abatutsi ubu acumbitse mu baturanyi nyuma y’uko inzu yari asanzwe yibanamo wenyine ishenywe n’imvura imaze iminsi igwa muri aka gace. Biteganyijwe ko iyi nzu Mukarugomwa ari kubakirwa izaba yuzuye mu mpera z’uku kwezi kwa gicurasi.

Ubusanzwe inkeragutabara zari zisanzwe zigaragara mu bikorwa bitandukanye zifatanyije n’abandi baturage gusa ngo iki gikorwa zahisemo kugikora  zonyine kugira ngo nazo ubwazo zigire igikorwa zikora kigaragara.

Ndikuryayo Emmanuel, uhagarariye inkeragutabara mu karere ka Nyamagabe yatangaje ko n’ubwo nta ngengo y’imari inkeragurabara zigira, ziyemeje gukoresha amaboko yazo mu gufasha uyu mukecuru, ati “ Mu by’ukuri tuzashyiraho amaboko ariko bibaye ngombwa ko hari n’ibindi dukora bitari iby’amaboko, twakora n’ikindi gikorwa twabona cyatuma nyine ashobora kujya mu nzu igaragara.”

Mu gihe imirimo yo kubaka iyi nzu izakorwa n’inkeragutabara, amabati yo kuyisakara yatanzwe na World Vision ,umuryango utegemiye kuri leta naho ibiti n’imisumari bitangwa n’ubuyobozi bw’umurenge wa Cyanika.

Nyirahabimana Esther ashimira umuryango Ibuka ko wamukoreye ubuvugizi agasubirana inka ye

Inka ya Nyirahabimana Esther yaharaniye ko yasubizwa

Umuryango ushinzwe kurengera inyungu z’abacitse ku icumu rya Jenoside yakorewe abatutsi muri Mata 1994 (Ibuka) ku rwego rw’igihugu, tariki 14/04/2012 yatangaje ko itigeze yishimira uko Nyirahabimana Esther utuye mu murenge wa Kibilizi mu karere ka Nyanza yambuwe inka yahawe na prezida Paul Kagame binyuze muri gahunda ye yise Gira inka munyarwanda.

Umunyamabanga Nshingwabikorwa wa Ibuka  k’urwego rw’Igihugu, FORONGO Janvier avuga ko uwo  mukecuru yahawe inka na Perezida Paul Kagame ariko nyuma ubuyobozi bw’umurenge wa Kibilizi atuyemo bukayimunyaga bwitwaje ko adafite ubushobozi bwo kuyorora.

Nyirahabimana Esther yambuwe inka ye biramuhungabanya

Ibyo bikimara kuba nk’uko FORONGO Janvier abivuga uwo mukecuru yagize ihungabana rishingiye  kuri iyo nka yari amaze kwamburwa. Ati: “Nagiye kubona mbona umukecuru ageze mu biro bikuru bya Ibuka asaba ko yarenganurwa kubera ikibazo cy’inka yahawe na Prezida Paul Kagame ariko nyuma akayamburwa n’ubuyobozi bw’umurenge wa Kibilizi atuyemo”.

Forongo Janvier avuga ko yahise yihutira kuvugana n’ubuyobozi bw’umurenge wa Kibilizi asaba ko bwasubiza uwo mukecuru inka ye.

Umukozi w’umurenge wa Kibilizi ushinzwe imibereho myiza y’abaturage Gasime Anne yemeza ko icyo kibazo cyabayeho Nyirahabimana Esther akamburwa inka ye n’ubuyobozi bw’uwo murenge.

Mu izina ry’umurenge wa Kibilizi Gasiime mu mugambo ye bwite abisobanura agira ati :  “ Uyu mukecuru yari yaraturutse ahantu hari akagendo hitwa Gisasa bitewe n’uko yashakaga kujya guhinga aho isambu ye iri nayo yarayijyanaga rero tuza gusanga ko iyo nka ishobora kuzavaho ikanapfa turayimwaka”.

Ati: “Nyuma y’izo mpungenge twashakishije undi muntu twayiha uyishoboye hanyuma umukecuru yazagira ubushobozi akongera kuyisubizwa’.

FORONGO Janvier, umunyamabanga Nshingwabikorwa w’umuryango Ibuka asanga icyemezo cyafashwe n’umurenge wa Kibilizi atari cyo cyari kuba igisubizo kirambye.

ati: “ Ntabwo inka ariyo yagombaga gutekerezwaho mbere y’umuntu kuko hari uburyo bwinshi byagombaga gukorwamo ariko inka y’uwo mukecuru akayigumana bitarinze gufata intera byagezemo”. Byamwongereye ihungabana ugereranyije n’ibindi bibazo yari afite bikomoka ku bikomere yasigiwe na Jenoside yakorewe abatutsi muri Mata 1994 niko Forongo Janvier yakomeje abivuga.  

Umuryango Ibuka ukimara kubona ko inka y’uwo mukecuru yateje ikibazo yasabye ubuyobozi bw’umurenge wa Kibilizi kuyimusubiza ndetse imufasha no kumushakira abagiraneza bazakomeza kwita kuri iyo nka ye ariko ntiyongere kuzayamburwa ukundi.

Ubwo umuyobozi wa Envirocleaners International Niyonzima Claude yasuraga uwo mukecuru ari kumwe n’ubuyobozi bwa Ibuka ku rwego rw’igihugu yasize amwemereye kuzamuhingira ubwatsi bw’iyo nka ndetse anamusigira sheki y’amafaranga ibihumbi 100 by’amafaranga y’u Rwanda agenewe kumufasha mu tuntu duto  tw’ingenzi yakenera.

Mu rwego rwo gukomeza kumufasha kandi kwiyubaka Niyonzima Claude yijeje uwo mukecuru ko agiye kumubera umuhungu we.

: “ Nijeje u Rwanda n’abanyarwanda, akagali n’umurenge wa Kibilizi iyi nzu n’iyi nka birimo ko kuva ubu mbaye umuhungu we, w’uyu mukecuru; niyemeje kuzamubera umwana nawe akambera umubyeyi”.  

Yakomeje agira ati : “Nzamukurikirana mu buryo bwose bushoboka kandi nzaharanira ko ibyo bintu bigerwaho, umukecuru wanjye ntazanyambarana ubusa, ntazamburana amazi, ntazamburana igitenge uko bizagenda  kose”.  

Ku ruhande rw’uyu mukecuru we ibyishimo byari byose ashimira umuryango Ibuka ko wamuvuganiye hose akongera gusibizwa inka ye yari yambuwe n’ubuyobozi bw’umurenge wa Kibilizi mu karere ka Nyanza.

Umurenge wa Kibilizi ni umwe mu mirenge y’u Rwanda ifite abacitse ku icumu benshi bitewe n’uko uhana imbibi n’Abarundi bari impunzi muri ako gace hanyuma jenoside itangiye bagafatanya n’interahamwe mu kwica abatutsi.